紅軍齊心o趙拖肥

猪拉多纳

隊友誓踢好波 感動「咬人蘇」留隊

今晚英超有場默西塞德郡打吡戰，由利物浦主場火併世仇愛華頓，戰況肯定勁精彩，大家咪錯過呀！講到推介，「拖肥糖」家陣排第6，落後第4位嘅阿仙奴5分，為爭前4鬥志係唔差，可惜佢哋近排作客戰績衰到貼地，嚟到死對頭嘅晏菲路球場睇怕好難有運行，今場一於撐1.77倍紅軍主勝啦！

（有線200及300周日晚8:30直播）
愛華頓教頭主力等走人

雖然愛華頓上星期聯賽喺主場以1:0擊敗富咸，繼續向爭取歐洲賽資格努力，不過睇番佢哋近期嘅作客成績，對上6場波竟然只得3和3負，當中仲包括喺足總盃作客甲組仔奧咸都贏唔到，狀態飄忽成咁，試問今晚憑乜去砌紅軍吖？而且領隊莫耶斯被傳會去德甲搵食，日前佢受訪嗰陣，仲嬲爆爆咁話拒絕回應，擺明就係身有屎啦！仲有呀，中場Icon費蘭尼、前鋒米拿拉斯同謝拉域又分別被豪門睇中，下季9成離隊，軍心散成咁，班球員仲邊有心機搏命呀？
史杜列治擔正有貨交

另邊廂嘅利物浦啱啱相反，佢哋近5場聯賽保持不敗之餘，士氣仲鬼死咁好，尤其係前鋒蘇亞雷斯被重判坐10場波監後，反而激發起佢班隊友嘅鬥志，日前隊長謝拉特仲走出嚟話，要係咁入波，做埋「咬人蘇」嗰份，希望藉此感動心灰意冷想離開英超嘅蘇亞雷斯！

老實講吖，小妹一直都好欣賞新星史杜列治嘅技術，上仗佢難得擔正，就即刻炮製咗2個入球同1個助攻，同中場菲臘比古天奴仲好鬼夾，有佢兩個撐住，小妹相信弗到爆嘅利物浦會喺主場贏波，上周佢哋作客都能夠炒紐卡素6蛋，證明呢班波只要有決心，冇嘢係冇可能！
微博傳情：開心又失落

尋日係南華今季最後一場賽事，我梗係有去大球場撐愛隊同影捧盃相啦！講真，小妹尋日開心得嚟又有啲失落，因為嚟緊幾個月嘅星期六、日下晝冇本地波睇，我無晒精神寄託喇……
推介：利物浦（勝）