弗奧雙「堡」演入球騷

猪拉多纳

爭入前6 Vs 搶分護級

等咗好幾年，歐聯決賽始終未能上演西班牙國家打吡，相反德國內訌就喺今屆搶閘出爐，畢竟當地球會財政普遍健全，相信德甲極可能取代英超同西甲，成為歐洲第一大聯賽。

德甲去到最尾3輪比賽，「四哥」史浩克04喺周五獨腳戲贏波後，頭4名基本上大局已定，現階段係得歐霸盃席位及護級戰線尚未明朗，今晚頭場弗賴堡主場迎戰奧格斯堡嘅雙「堡」戰，就肯定比尾場漢堡對禾夫斯堡更有睇頭，事關弗賴堡仲爭緊位踢歐霸盃，尾3嘅奧格斯堡就仍深陷水深火熱之中，雙方肯定搏甩髀。

弗賴堡早前於德國盃4強出局，入前4機會亦渺茫，惟有以保住前6、爭踢來屆歐霸盃為目標，佢哋上仗作客以0:1不敵拜仁之前，連續9場都有波入，火力相當有保證。至於作客嘅奧格斯堡亦有射手池東沅愈嚟愈入局，近3戰共入3球，鋒力唔使擔心，可惜後衞奇雲禾治要停賽，預料今場搶分戰有機會係一場入球騷，1.85倍入球大屬投X首選。

（有線61、64、201及203周日晚9:30直播）