薛達志好球破網

猪拉多纳

德國籍練馬師薛達志今季成績大跌，目前更要為爭取13Ｗ上岸而努力，尋日賽事終憑「好球」突破頭馬數字至雙位數，累積季內第10Ｗ，而相隔上一場喺３月6日所勝「喜運財星」，尋日頭馬亦正好打破練者守齋兩個月嘅悶局。
       
好球（左）爆半冷，為薛達志打破悶局。

對於「好球」成為廐內今季首匹兩捷馬，薛達志亦認為鐵馬今季表現實而不華，加上安國倫同呢匹馬合作多時，可以講係駕輕就熟，單睇今季人馬合作八次兩冠兩亞，已經知道佢哋合拍程度。難得隻馬喺季尾依然愈戰愈勇，所以薛達志講到明「好球」今季仲會繼續跑，相信呢匹馬將會係練者爭取達標嘅重要籌碼。