百威將領有力一戰

猪拉多纳

　　季尾賽事唔易賭，強如「精彩日子」一樣可以跑到冇三甲，服未？！由此帶出老掉牙教誨，賭馬真係唔能夠孤注一擲，有時輸起上，想避都避唔到。亦有謂「贏就谷、輸就縮」，如果近期手風麻麻，建議在注碼方面縮減，唔好自亂陣腳，信心及運氣呢兩樣，有時要慢慢儲。

　　第一場五班1650米。「好好運」唔係幾夠運，對上好幾場唔係冇好成績，但硬係贏唔到，經常出現來遲一步鏡頭，冇得好講，馬性如此。好就好在本身狀態保持得到，對手來來去去係堆，更有直情近績唔好，睇落大部分唔惡得出樣，希望有步速配合，畀佢贏番場。

　　上場騎得曳

　　第三場四班1650米。同場之中，好多季內未贏過，包括心水馬「百威將領」在內，賽事水準唔高，睇得起此馬原因，緣自近兩仗表現，分別在谷草一哩及1800米後上有勢。其實，上場唔係霍老哥騎得曳，直路唔實手韁繩，幾時會輪到「愛眼光」有位置。今次只要人馬表現醒醒定定，唔係水準無故大跌，點會冇得爭。

　　第六場二班1000米。「喜寶駒」可能係今晚賠率最熱馬，隔晚唔夠兩倍，但又冇辦法，賽績太勁，上次硬撼「牛精好友」，人人識得計，轉到谷草，除非場地應付唔到，如果勝任，試問邊度搵類似上場那批勁旅，捧唔捧W，大家自己想想，膽則必然。