白蘭恩主場撎史達出氣

猪拉多纳

今日阿King想集中講吓周中開快車嘅挪超，其中白蘭恩顯盡地頭蟲本色，開季主場全勝，上仗作客打少個失晒三分，眾將谷埋成肚火，今返主場勢必搵史達出氣，主勝好路捧得過。

（周五凌晨1時開賽）

有啲球隊喺自己地頭表現特別醒神，白蘭恩就係最佳例子，開咧後聯賽四場贏晒，不過該隊作客三場全敗，主強客弱特性鮮明，正如上仗作客尾四嘅桑恩達，半場多啲已經輸緊兩粒，之後仲有守將莊拿斯高隆拿被逐，一如所料返魂乏術。好彩今仗重返無敵主場比賽，白蘭恩嘅「主場殺手」侯錫納普腳風超順，必定將輸波嘅冤屈氣發洩喺對手史達身上，後者近況認真麻麻，上仗主場對住曳到無倫嘅莫迪都拎唔晒三分，今仗好難全身而退，主勝有1.82倍可作過關重心。
莫迪低迷讓波捧對家

至於上季盟主莫迪持續低迷，聯賽開咧至今未嘗一勝，教頭蘇斯克查仲死撐話會漸入佳境，但球隊全無復甦迹象，就算主場出擊都讓唔起阿里辛特，「讓球客勝」有計。最後奧特格寧蘭今季三仗主場未輸過，況且近年主場對親史卓加斯特贏多輸少，擺明係格食格啦，有得受讓梗係捧奧軍「讓球主勝」。