李斯特城 屈福特 合演入球騷

猪拉多纳

每年踏入季尾嘅護級、升班席位爭奪戰都非常刺激，今晚就有李斯特城主場迎戰屈福特嘅英冠升班附加賽準決賽首回合喇！李斯特城雖然入波唔少，可惜主場之利唔明顯，防線近期更係穿晒窿，遇上火力超強嘅屈福特，絕對有力延續近期開大嘅走勢，1.8倍入球大值得捧！

（開賽時間：周五凌晨2:45）
李城跌Watt後防穿窿

李斯特城喺聯賽最後13輪居然只係贏到2場，同分之下以得失球差壓過保頓奪得最後一個升班附加賽資格實在非常好彩，而且最後6場主場賽事只得1勝，令小妹實在唔敢捧「主W」！

仲有呀，李斯特城雖然可以夫添上陣，但已經連續5戰每場失2粒，成條防線明顯穿咗窿，如果唔係靠住態勇嘅安迪京治、基斯活特等頻頻取得士哥，來季就肯定要留喺次級聯賽，攻強守弱，難怪連續5戰開出入球大啦！
蘇拿：唔會再錯過升班機會

屈福特雖然喺聯賽煞科戰意外輸畀列斯聯，錯失直接升班嘅機會，但呢支由車路士名宿蘇拿帶領嘅球隊火力係英冠之首，每場平均取得1.85球進帳，絕對有本錢同防線唔掂嘅主隊鬥攻，就算主力射手迪尼停賽，唔好忘記艾文阿布迪近況同樣大勇，近3戰有2球進帳，加埋蘇拿講明唔會再錯過附加賽呢個機會，客軍鬥心肯定十足，大家都係坐定定等睇入球騷啦！
英冠附賽制

採主客兩回合制，今輪為準決賽首回合。若兩回合計打和，將於次回合法定時間後加時30分鐘，再和則以互射12碼定勝負。