車路士爭前4打殘維拉

猪拉多纳

今晚英超上演獨腳戲，由阿士東維拉主場迎戰車路士，維拉近期頻頻搶分得手，聯賽進佔第13位，護級已經差唔多「上岸」，相反車路士周中畀熱刺逼和2:2，歐聯資格仍未到手，如果作客維拉公園有乜差池，煞科日將會承受極大壓力，為免夜長夢多今晚絕對唔會放軟手腳，3倍「讓球客勝」一定要留意！

（有線200及300、廣東體育周六晚7:45直播）
維拉護級壓力減戰意鬆懈

維拉最近喺英超連贏兩場，表面上睇狀態唔錯，理應有捧場價值，不過大家要留意維拉係「欺善怕惡」球隊，今季對住頭5名勁旅戰績慘不忍睹，錄得1和8負嘅羞家成績，就算主場都毫無甜頭，睇完呢個數據真係揀唔落手囉！而且護級壓力大減之下，隨時連戰意都會有所鬆懈，對住急於搶分嘅車仔，相信都係凶多吉少。

車仔周中雖然贏唔到熱刺，但係近況真係唔講得笑，近7場有5勝2和佳績，當中包括作客擊敗曼聯，歐霸盃亦殺入決賽，嚟緊就會同賓菲加爭冠，不過唔好以為佢哋會留力，事關車仔前4位置仲未穩陣，始終踢歐聯先係頭號目標，今場放水機會好低。

唔好忘記，車路士近期無論係前鋒定後防，都有極強嘅入波意欲，好似中堅大衞雷斯更加頻頻入世界波，今場入球絕對唔成問題，何況傳出「寸王」莫連奴再度上車，下季無份踢歐聯點得呀？今晚一於進取啲博車仔贏兩粒以上！