6分波修咸頓捉黑貓

猪拉多纳

英超護級形勢緊湊，仍要搶分嘅新特蘭將會喺主場對住未上岸嘅修咸頓。從聯賽勝出率及得失球數字睇出，兩支球隊實力可謂相當接近。不過今場主隊「黑貓」陣容不整，預料會對球隊演出構成重大影響，今場開出平手盤，巨高認為客隊可以秤先。

（有線304台周日晚10時直播）
迪肯尼奧冇兵難施法

新特蘭近期傷停情況都比較嚴重，中場大將格力加特拿及貝寧前鋒施斯隆都要停賽，首席射手史提芬費查足踝受傷仍處於休養階段，卡達莫膝傷又唔出得。基於新特蘭高質球員真係唔多，領隊迪肯尼奧未能排出最強陣容出戰，肯定會對「黑貓」搶分計劃造成阻力。

再講，新特蘭近期演出都唔係太好，上仗對史篤城打和1比1，前一場鬥阿士東維拉更輸到1比6。新特蘭季尾走勢似乎唔多暢順，今次仲有幾名主力成員缺陣，就算主場出擊都唔敢太樂觀，領隊迪肯尼當然都好難施「法術」。

修咸頓同樣欠近績支持，近三場不勝兼冇入球。但能於三月份連贏利物浦同埋車路士，修咸頓差極有個譜，今仗能以作客身份贏波都唔覺得奇怪，「聖人」射手列基林拔冇病冇傷可如期上陣，今場球隊靠晒佢攞分。