熱刺疲兵冇力攻史篤城

猪拉多纳

英超前4資格爭奪極度緊湊，目前稍微落後嘅熱刺形勢較差，剩低2場聯賽不容有失，不過佢哋今晚作客史篤城危機重重，「王牌」加里夫巴利疑似有傷表現下滑，而且球員經歷連場硬仗後體能令人擔憂，今晚造訪踢法極度硬淨嘅史篤城隨時被炸散，受讓半一嘅主隊下盤，值得捧場。

（有線200及300、廣東體育周日晚8:30直播）
加里夫巴利帶傷出戰

熱刺周中只能逼和車路士，爭前4變得被動，一定要望車仔同阿仙奴失分先有機會後上，當然佢哋自己先要場場贏晒先啦，可惜今晚係佢哋9日內第3場英超，而且連續2場作客，唔好忘記熱刺近3戰都係喺80分鐘或之後先入波，證明呢班人場場都係由頭搏到尾，體力消耗可想而知。最大鑊係加里夫巴利足踝傷患其實未好番，早幾日對車仔，就多次見佢摸住自己隻腳，情況令人擔心！

史篤城向來以體力化踢法見稱，今晚對住疲兵熱刺當然有着數，而且佢哋近3戰有2勝1和，門將貝高域更係多間歐洲勁旅收購目標，呢位波斯尼亞門將若果想食大茶飯，梗係要加多兩錢肉緊守住個大門啦！阿占提一提大家，完場後記住留喺高清200或者英超300台，一齊見證曼聯响奧脫福捧盃，送別我哋都唔捨得嘅費格遜啦！
頂占筍盤：史篤城（下盤）