皇蘇三寶「大」展拳腳

猪拉多纳

開行火力爭踢歐聯

今季異軍突起嘅皇家蘇斯達，家陣要搶分力保歐聯席位，今晚喺主場迎戰CF格蘭納達，勢必以最強火力狂攻對手！不過有復甦迹象嘅客軍為求衝上護級安全島，面對西甲火力第3強嘅皇蘇都肯定唔會輕易扯白旗投降，小妹預期呢場雙方會對攻，1.62倍入球大趁熱食！

（開賽時間：周二凌晨4:00）
格蘭納達恩哈路專劏強隊

講到成個西甲嘅鋒力，唔使問都知係巴塞同皇馬最強啦，不過唔聲唔聲，原來皇蘇每場平均都入到1.82球，緊隨兩大豪門之後排第3，算叻仔o架喇！咁又係喎，佢哋陣中嘅阿基列斯、卡路士韋拿同干沙路卡斯度呢個喪攻鐵三角，今季聯賽夾埋入咗31粒，其中21球都係喺主場攻入，難怪呢班波可以保持近13場主場賽事不敗，近7戰有6場至少攻入3球嘅強勢啦！就算今晚佢哋有中場恩尼高馬天尼斯有傷唔踢得，都唔使擔心冇「士哥」。

CF格蘭納達家陣雖然排喺中下游位置，但佢哋為咗盡快「上岸」，近期好似發窮惡咁，連續2場開到W，證明絕對唔好恰。係，恩哈路呢位射手今季聯賽入波雖然得4粒，但就先後射爆巴塞同馬拉加兩支勁旅，另一件前鋒艾比亞把握力同樣有番咁上下！睇埋皇蘇近2場波都係失2粒，防線唔穩陣，隨時畀格蘭納達偷雞成功，既然兩邊都攻強守弱，都係玩入球大最過癮！