白禮頓水晶宮鬥做「細」界仔

猪拉多纳

爭升班掘金唔敢亂嚟

英冠升班附加賽4強次回合今晚開打，白禮頓喺主場對水晶宮，繼續追入球細！根據統計，首回合白禮頓得6次射門，撞啱水晶宮嘅英冠神射手格連梅利傷埋，兩軍今鋪入波唔慌多，追1.68倍入球細最好。

（廣東體育周二凌晨2:45直播）

首回合雙方互交白卷，即使計埋另一場英冠附加賽，都係開唔到入球騷，就知升上英超嘅收入實在太驚人，搞到班球員唔敢立亂搶攻！試諗吓，唔覺意谷得太上，隨時連累球隊失波遺憾一世，唔想做衰仔當然守住嚟踢，首回合白禮頓作客6次埋門得3次中框，水晶宮主場都係得嗰8次射門，唔通呢場會變入球騷咩？
白禮頓近10次半場冇失波

再講，白禮頓射手馬卡爾史密夫仲養緊傷，冇咗佢，前線威脅力差好遠，而且領隊普耶喺09年開始帶隊，難得有機會領軍升上英超，部署當然會更穩陣，淨係睇白禮頓連續10仗半場冇失波，就知佢哋踢法保守，今晚隨時再悶和0:0，到加時先分出勝負都唔奇。
水晶宮食胡神箭膝傷打柴

另方面嘅水晶宮，佢哋件前鋒韋費特沙夏一早畀曼聯收購咗，係咪咁有決心幫水晶宮爭升班，真係得佢自己至知。最大鑊係水晶宮今季另一件食胡射手、攻入30球嘅射手格連梅利，首回合因膝部受傷離場，呢場9成9都唔使預佢，向對家借番嚟嘅前鋒史堤芬杜比又唔可以倒戈，咁搞法，仲搵邊個去入波先？