卡昂主場打硬仗「特」別醒神

猪拉多纳

今晚法乙爆發升班大戰，由排第5位嘅卡昂喺主場迎戰「3哥」南特。卡昂上仗擊敗摩納哥，況且南特主場輸畀克萊蒙特，兩軍差距家陣縮窄到得番3分，有射手杜咸姆復出嘅卡昂重燃爭升班希望，今晚勢藉主場之利砌低狀態不穩嘅南特，2.2倍主W咪錯過。

（開賽時間︰周二凌晨2:30）
南特首席射手啞火

卡昂上仗冇咗首席射手杜咸姆，仍然可以作客擊敗榜首摩納哥，就知佢哋成班球員無論質素同狀態都係一流。為咗爭升班，卡昂近排開行Turbo，今晚佢哋仲有杜咸姆復出攻堅，以呢位射手缺陣前4仗入4粒嘅狀態，根本唔使驚卡昂冇波入。

相反南特狀態反覆，既可以大炒查多魯，但又可以喺主場不敵下游分子克萊蒙特，認真估佢哋唔到。最大鑊係佢哋件首席射手菲臘佐積域啞晒火，近7戰只係靠12碼入得1粒，想喺法乙最穩防線嘅卡昂身上攞着數，似乎難啲囉。咪忘記南特喺3、4月分別作客昂熱同迪安兩支實力分子都敗陣而回，可見南特一打硬仗就腳仔軟，今鋪都係捧卡昂最划算。