水手搶W賀日職20年

猪拉多纳

唔經唔覺，日職已經創立咗20年，今日所有J聯賽賽事都有慶祝活動，巴西「白比利」薛高仲會響鹿島鹿角對鯨魚場波，擔任特別嘉賓添，（六）6嗰場橫演水手對仙台維加泰自然唔例外，不過慶典波未必一定開入球騷，主隊水手可能只求贏波算數，玩1.8倍主W啦。

沉咗幾年嘅水手，今季開始明顯有起色，家陣只係落後大宮3分排第2，難怪作為「J聯賽元老」嘅水手，雄心勃勃話要攞冠軍。93年只係中三學生嘅中村俊輔，到依家仲Keep住日職元年揭幕戰嘅波飛，佢亦誓言一定要幫水手重溫十年前嘅王者美夢。
同建築公司合作送大禮

為咗谷大場波嘅觀眾量，配合20周年慶典，水手今日同一間建築公司合作，送成萬份禮物，裏面包有簽名波、簽名波衫之類，好有決心贏波。但係佢哋想炒起仙台唔容易，因為唔講唔知，齋計主場聯賽對碰，水手原來都有10年時間未贏過仙台，近3年喺日產球場交手仲輸晒添，真係冇乜優勢可言。

當然，由今季走勢去睇，水手始終高過仙台半線，而且客軍有後衞島川俊郎、梁勇基亦未好得番晒，前鋒威爾遜洛迪古斯仲停賽。但係佢哋做足備戰工夫，仲用左中場希貝迪模仿水手大腦中村俊輔嚟練防守，仙台準備得咁好，輸都唔會好大鑊，玩水手主勝啱數o架喇。