費Sir千五場征西惜別

猪拉多纳

曼聯主帥費格遜喺煞科日揮軍作客西布朗，今場係佢第1,500次帶領「紅魔鬼」征戰，亦係佢領隊生涯最後一戰。老費教埋今場就退休，今戰雖然缺少去留未定嘅「舊愛」朗尼，但仲有「新歡」尹佩斯幫佢撐起鋒線，風流球隊西布朗冇嘢好爭，相信唔會搞寸費Sir告別派對，捧客W！

（有線61台周日晚11時直播）

費爵爺宣布收山後連日來表現風騷，早前直認多年來有向球證施壓以爭取更多補時，今場賽前記招又話曼城錯炒文仙尼，臨別都不忘寸爆死敵。費Sir仲提前自爆今場用人之策，將以副選連迪加特把關，但要求轉會嘅朗尼預期會缺陣。不過，大軍前線仲有英超神射手尹佩斯及高效箭頭查維亞靴南迪斯，夠晒火力啦！
西布朗唔搞寸Party

西布朗教頭奇勒同費格遜冇乜交情，但佢都話好榮幸可以成為費Sir人生最後一戰嘅對手，大軍將會列隊歡迎英超冠軍隊「紅魔鬼」。西布朗季尾大踢風流波，近期成為黃大仙周圍派分，今場只係例行公事，冇必要搞寸Party得失費爵爺，相信佢哋會繼續Hea踢。兩隊近十次碰頭曼聯錄得九勝一和，完全冇得打，就算西布朗有心玩嘢，恐怕都係無力搞搞震，一於捧客勝！