莫帥認衰：最差一季

猪拉多纳

艦隊稱臣馬體會 同C朗齊被逐

皇馬「莫連奴王朝」衰收尾！皇馬昨日凌晨喺西班牙盃決賽同宿敵馬體會激戰120分鐘，加時輸1:2失盃。莫連奴光榮告別巴拿貝夢想落空，仲衰到同愛徒C朗齊齊被逐離場。「銀河艦隊」皇馬全季只得一個西超盃，「寸王」賽後喺記者會終於認衰，直言今季係佢領軍生涯最差一季。

今仗皇馬喺開賽14分鐘就憑C朗建功領先，但馬體會喺35分鐘就憑迪亞高哥斯達入波扳平。之後皇馬先後有C朗、奧斯爾同賓施馬射門中柱，相當黑仔。到加時戰客隊憑祖奧米蘭達接應角球頂入反超前2:1，谷到成肚火嘅C朗喺114分鐘被侵犯順勢施展「倒掛」踢人，領紅被逐。完場前馬體會雖有基比2黃1紅離場，但仍保住勝果奪標，近14年來首次擊敗皇馬。

好大機會喺季尾走人嘅莫帥，喺下半場30分鐘因為向球證激烈投訴換來紅牌一張，要知道今場波執法球證施路斯高美斯原來同莫帥早有過節，2010年底皇馬對西維爾賽後，「寸王」曾經喺記者會列出施路斯高美斯嘅13宗罪，數臭對方，依家仇人見面，人哋梗係要「做嘢」啦！
傳媒批寸王大不如前

據聞莫連奴賽後一直喺球員通道等住高美斯經過，打算叫對方同馬體會一齊慶祝奪冠，最終佢有冇鬧到高美斯就冇人知，但事後同C朗都冇現身頒獎禮嘅佢，喺賽後記者會就話：「今季係我教練生涯最差一季，對於我同皇馬，只贏一個西班牙超級盃肯定唔夠。」佢同時死撐批評馬體會演出唔及皇馬，根本冇資格奪標。

此外，莫連奴話自己同皇馬仲有3年約未定去留，不過有傳媒幫佢計數，接掌「艦隊」以來3季，皇馬就只分別贏得西盃、西甲同超級盃，相比起佢之前無論帶領波圖、車路士定國際米蘭都大有不如。

馬體會教頭施蒙尼帶兵年半，都攞歐霸、歐洲超級盃喇！賽後15000名馬體會fans上街慶祝發生打鬥，共21人求醫。