紅魔開W「布」答費Sir

猪拉多纳

恩師告別戰豈容污點！

1986年11月6日，費格遜正式接掌「紅魔鬼」帥印，今晚佢帶住13座聯賽冠軍獎盃同大家告別！曼聯今晚作客西布朗，因為掛上「費格遜領隊生涯終極戰」之名變成焦點，好勝嘅費格遜又點會畀自己領軍最後一戰留下污點？1.65倍客勝非常穩陣！

（有線61周日晚11:00直播）

英超煞科日基本上大局已定，多場風流波真係好難觸摸，不過曼聯戰意肯定比好多球隊優勝，如果費格遜最後一擊都贏唔到，呢個超過4分1世紀嘅美麗故事就會畫上遺憾句號，傑斯、里奧費迪南、史高斯等一班跟隨費Sir搵食多年嘅球星，更已講明要用勝仗歡送費格遜。
單計下半季西布朗排尾三

事實上，數據顯示曼聯過去20季入面，有15季成功喺煞科戰贏波，而且今季13次作客面對前6名以外嘅球隊，「紅魔鬼」一共贏咗10場咁多，證明佢哋嘅穩定性係奪冠最大原因，應贏則贏，費格遜調校球員戰意真係有一手！即使朗尼被傳可能喺今夏走人，但曼聯仲有尹佩斯、韋碧克同查維亞靴南迪斯等射手，呢場告別派對又點會留手？

西布朗雖然排第8位，但如果只計下半季成績，佢哋只係好過昆士柏流浪同史篤城排尾三，就算想玩寸個Party都有心無力！加上西布朗借將前鋒盧卡古合約完結勢必走人，呢位王牌射手近8場聯賽只入得1球，明顯無心戀戰，想阻住費格遜贏波冇咁易。
頂占筍盤：曼聯（客勝）