好利佳黃金機會

猪拉多纳

　　呢幾日落雨落到好似個天塌下來，此情況仲會持續好幾日，除非今日突然反常，天清氣朗，唔係又會係水戰。眾所周知，場地濕滑易生意外，有部分騎師比較安全第一，而呢類騎師往往在水戰成績麻麻，但又唔能夠怪得晒佢哋，命仔緊要嘛，所以，今晚捧邊啲騎師？大膽嗰啲囉！

　　第一場五班1000米。「高山威龍」上季插三班，好早已經有表現，當時六十幾分起步，本來冇問題，可惜喘鳴症作怪，以致淪落到五班。

　　高山威龍贏面大

　　老實講，「高山威龍」降班唔一定大晒，如果陣上條氣唔暢順，一樣可以跑到箸菜咁，好彩最近幾仗跑得唔係曳，希望唔會復發，只要跑得出之前四班輸得接近水準，應該好大機會出頭。

　　第五場三班1000米。「好利佳」腳患底嚴重，近期跑得密已經係好事，可惜隻馬成日被電腦愚弄，連續4仗抽了大外檔，其中兩仗在1000米及1200米入Q，已經好抵讚。今次皇天不負有心人，終於排到2檔，點會唔珍惜大好機會，係時候贏馬交代。

　　第七場三班1650米。「幸運金龍」上季有本事贏3場頭馬，勢估唔到今季跑到依家仍然冇着落，4歲停止進步？上季搏多咗 ？ 阿棟唔多清楚，不過，上季三班取兩W冇花假，實力已有證明。希望進度在季尾趕得上，愈搏愈弗，加上路合檔利，畀佢贏番場。

　　點買法

　　「好利佳」隔晚已經熱得好緊要，獨贏只得3倍，抵唔抵 ？ 閣下自理，於我而言，誠屬整晚重心所在，一定用嚟做QT膽，配腳拖「八心之鑽」、「威威多星」、「勁賽王」及「金湶」。