拜仁讓半一唔嫌多

猪拉多纳

全面升呢 史上最強

歐聯決戰德甲雙雄內訌，多蒙特同拜仁會師倫敦溫布萊！拜仁今季全面升呢，戰鬥力突飛猛進，無論聯賽、歐聯同德國盃都遇神殺神，成績同演出有口皆碑，對首次成就「三冠」偉業信心十足。事實上佢哋已經搵到對付宿敵多蒙特嘅方法，今晚移師中立場踢，黑柴對拜仁喺九十分鐘內贏波封王信心十足，拜仁讓半一照撐上盤。

（有線61及64台周日凌晨2時45分直播）

拜仁近年喺歐戰成績愈嚟愈好，今次已經係四年來第三度殺入決賽，但喺對上兩季國內賽事卻畀異軍突起嘅多蒙特恰住，除咗連續兩屆失落聯賽錦標外，仲曾經連續五次對壘輸晒。不過踏入今季，拜仁多年默默耕耘終屆收成期，全隊演出突飛猛進，除咗聯賽重奪錦標外，仲破盡德甲紀錄，以25分史上最大差距反壓多蒙特封王，乜仇都報晒，今季佢哋由超級盃開始四度同多蒙特交手兩勝兩和，足見已經搵到對付多蒙特方法。

多蒙特早兩季折服拜仁，係全攻全守、不惜氣力喪跑嘅整體戰，令倚仗個人質素突破嘅拜仁一籌莫展，不過拜仁吸取教訓後痛定思痛，今季除人腳實力進一步提升外，踢法上亦唔輸蝕，老帥軒歷基斯終於將一班球星融為一個團結整體，連世界級嘅「國王」列貝利都肯無私付出，為球隊助攻助守喪跑，呢種進步令佢哋取得重大突破。喺歐聯戰場上，竟然可以先後以4比0輕取意甲霸主祖雲達斯，7:0蹂躪「地上最強」巴塞隆拿，強勢令舉世震驚。資格最老嘅名譽會長碧根鮑華豪言現時嘅拜仁係球會「史上最強」，係時候為球會帶來第五個歐洲冠軍寶座。
多蒙特金童缺陣差好遠

多蒙特今屆歐聯屢破強敵，殺入決賽亦實至名歸，不過球隊目前不在最佳狀態，「金童」馬里奧葛斯因傷缺陣更係致命傷，皆因佢哋後備兵源較弱，今晚無論用哥斯基奧斯、紐尼沙軒或者基爾取代，都無法彌補中場攻守效率嘅削弱，加上曉姆斯、羅拔利雲度夫斯基兩名大將都有輕傷，過去一周曾經缺練，右閘比薛斯基帶傷上陣，捱埋今仗就要開刀，呢批主力球員狀態令人擔心。歐聯決賽高手過招，細節決定成敗，多蒙特喺多個位置上出現不明朗因素，面對「史上最強」嘅拜仁擺明唔夠砌。