哥連泰斯技「高」一籌

猪拉多纳

巴甲聽朝Kick Off

新一季巴甲聯賽聽朝揭開戰幔，首日焦點自然係由奪標大熱、剛啱贏咗聖保羅州聯賽冠軍嘅哥連泰斯，喺主場迎戰里約州冠軍保地花高。主隊今季積極增兵，前線三箭柏圖、荷西古里路同羅馬連奴技術、活力同經驗兼備，撞正對手受到欠薪風波困擾，未必能夠專心應戰，哥連泰斯唔難大勝一場，1.7倍主勝要捧！

（開賽時間：周日早上8:00）

今季巴甲奪標4大熱門入面，有老將迪高涉服用違禁藥暫時停賽嘅衞冕冠軍富明尼斯，同埋有朗拿甸奴壓陣嘅明尼路，由於仲要喺南美自由盃爭霸，喺季初難免留力，影響爭標機會。至於老牌勁旅聖保羅今季實力明顯有所減弱，之前喺州錦標同自由盃都冇料到早早玩完，其餘半冷分子山度士又因為主將尼馬隨時過檔巴塞，剩番嘅哥連泰斯奪標呼聲的確高唱入雲。
保地花高拖糧士氣曳

睇番哥連泰斯今季陣容，前鋒「鴨子」柏圖回流，加上名將羅馬里奧之子羅馬連奴嘅冒起，配合秘魯射手荷西古里路嘅鋒線，威力的確冠絕巴甲，要打響頭炮又有幾難？保地花高呢邊，雖然近況唔差，但要37歲老將施多夫繼續保持勇態，單天保至尊似乎幾難。何況佢哋今季由1月開始，球員經常被拖糧影響士氣，今鋪客場出擊，睇怕凶多吉少。
巴甲20大軍：富明尼斯

上季排名：1

教練：艾比爾布拉加

孭飛球星：費特、堤亞高尼維斯

簡介：近3季奪得2次聯賽冠軍，雖然中場迪高未能通過藥檢要停賽，但射手費特留隊，相信影響唔大。
明尼路

上季排名：2

教練：古卡

孭飛球星：朗拿甸奴、基拔圖施華

簡介：小保加借將艾斯古迪路離隊，幸加入艾加拉法射手迪亞高泰達利及華斯高前鋒阿歷辛度，力足爭霸。
甘美奧

上季排名：3

教練：盧森保高

孭飛球星：馬些路摩蘭奴、艾蘭奴

簡介：改由前巴西主帥盧森保高執教後成績大躍進，前鋒伊度亞度華加斯同中堅克里斯來投，實力大增。
聖保羅

上季排名：4

教練：利尼法蘭高

孭飛球星：路爾斯法比安奴、甘素、盧斯奧

簡介：射手路爾斯法比安奴留效，新兵好似老牌中堅盧斯奧同射手艾萊斯奧都有級數，新季以前3名為目標。
華斯高

上季排名：5

教練：奧圖里奧

孭飛球星：艾美臣、卡路士坦奴利奧

簡介：中前場鐵三角包括「P祖」、阿歷辛度同伊度亞度哥斯達統統離隊，猶如拆骨嘅華斯高今季難創佳績。
哥連泰斯

上季排名：6

教練：迪迪

孭飛球星：荷西古里路、柏圖

簡介：上年捧走世冠盃後星散，大卡士僅荷西古里路、柏圖壓陣，今季靠晒新兵連拿度奧古士圖等。
保地花高

上季排名：7

教練：奧利華拉

孭飛球星：施多夫、祖利奧施薩

簡介：奧利華拉不倚重球星作風將繼續為球隊注入活力，喺多名主將離隊下，僅靠老將施多夫以老帶新。
山度士

上季排名：8

教練：拉馬曹

孭飛球星：尼馬、伊度達辛拿、安德菲臘比

簡介：近年專攻自由盃，對上5季最佳戰績只係第8，而且尼馬會唔會留隊仲係未知數，今季展望唔樂觀。
高士路

上季排名：9

教練：馬些路奧利華拉

孭飛球星：迪亞高蘇沙、保拿奧

簡介：兩名「孭飛」新兵蘇沙同保拿奧雖具質素，但之前只係喺亞洲聯賽搵食，能否適應巴甲令人擔心。
國際體育會

上季排名：10

教練：鄧加

孭飛球星：科蘭、李安度達美奧

簡介：換上前巴西領隊鄧加做新帥，吸引咗艾頓列比路等歐洲搵食球員加盟，加埋科蘭留隊，隨時有驚喜。
法林明高

上季排名：11

教練：佐真奴

孭飛球星：李安納度莫拉、靴蘭尼

簡介：一年內三度換教頭，可惜新帥佐真奴對上一次領軍奪冠已係13年前，未必有能力領軍重拾昔日光輝。
紐迪高

上季排名：12

教練：施拿斯

孭飛球星：艾爾頓洛迪古斯、迪亞高蘇圖

簡介：上季帶領球隊以升班身份殺上中游嘅教練加路，同兩大前鋒基沙同阿羅約相繼離隊，隨時降番落乙組。
哥列迪巴

上季排名：13

教練：馬昆奴斯山度士

孭飛球星：李安度艾美達、阿歷士

簡介：能否殺入前10，將視乎由基輔戴拿模加盟嘅中堅李安度艾美達，同埋由費倫巴治回流嘅阿歷士發揮。
邦迪比達

上季排名：14

教練：古度費拉拿

孭飛球星：路爾斯拉美尼斯

簡介：上季巴甲鋒力最弱隊伍之一，新季更有一對箭頭洛查洛迪古斯同基安卡路施華莫路離隊，戰鬥力大減。
巴希亞

上季排名：15

教練：祖爾辛坦拿

孭飛球星：奧賓拿、卡路士阿祖安奴

簡介：曾効力曼聯嘅中場基巴臣轉會費城聯，交換身份來投嘅前鋒費迪艾度，演出頓成關鍵。
波圖基沙

上季排名：16

教練：比文達

孭飛球星：盧斯路、威廉士蘇沙

簡介：門將迪達同埋首席射手般奴明尼路等主將相繼走人，今季想逃出生天可以話難上加難。
戈亞斯

上季排名：乙1

教練：摩亞里拉

孭飛球星：尼圖拜安奴、洛迪高巴達素

簡介：上季射入16球嘅借將前鋒禾達漢歷基或重返波圖，好彩由柏雷素爾買入咗尼圖拜安奴有一定實力。
基斯奧馬

上季排名：乙2

教練：華達奧

孭飛球星：基安卡路施華莫路

簡介：上季巴乙神射手薛卡路士離隊，火力大減，靠晒前鋒基安卡路施華莫路、中場般奴雷蘭等新兵。
帕拉尼恩斯

上季排名：乙3

教練：杜比斯基

孭飛球星：施路漢歷基、法蘭梅里達

簡介：射手尼艾圖轉投基多，中場馬蘭夏奧被山度士收回，加比爾馬基斯又轉投帕拉拿，倚重兩名孭飛新兵。
維多利亞

上季排名：乙4

教練：卡奧

孭飛球星：比安古基、艾斯古迪路

簡介：羅致奧林比亞高斯射手兼美斯表哥比安古基夠晒噱頭，但想成功護級，就必須改善作客不濟嘅毛病。