些路迪擺大個頭博喜雙飛

猪拉多纳

今晚蘇足盃爆發終極決戰，由喜伯年與些路迪會師咸頓公園球場爭逐錦標。傳統班霸些路迪為爭做雙料冠軍，鬥心唔使懷疑，但客勝同冠軍賠率熱到冇肉食，適逢喜伯年後防傷兵滿營，但有弗到爆嘅射手利治格菲斯壓陣，隨時以攻代守同「綠白軍」鍊過，呢場擺明係癲鳳鬥狂龍格局，入球大更加值博。

（周日晚10時開賽）

今季冇咗死敵格拉斯哥流浪阻頭阻勢，些路迪喺國內簡直係橫行無忌，唔單止於聯賽提早封王，更殺入歐聯16強兼贏過巴塞，認真威過威士忌，依家佢哋嘅目標，梗係要擸埋蘇足盃做雙冠王啦！事實上，「綠白軍」亦冇偷懶，喺最後兩輪聯賽有殺手加利賀柏啞火之下，依然豪贈對手8蛋，火力之強唔講得笑。
喜伯年鬥攻博一鋪

相反，喜伯年有主力守將基斯及麥柏基因傷提早收咧，隊長麥柏基更係隊中嘅精神領袖，冇咗佢哋令後防猶如紙紮，幸好前鋒利治格菲斯重拾佳態，佢今仗入多兩粒，便會成為球隊史上第3位一季喺各項賽事轟入30球或以上嘅球員，既然死守呢招唔Work，不如豁出去，靠呢位射手騷下哥利，同些路迪鬥攻博一鋪，睇嚟合演入球騷嘅機會高，大盤冇甩拖。