凱沙羅頓大起賀芬咸

猪拉多纳

次回合狂攻博翻身

歐聯決賽都踢完咗，大家可能感覺一個球季終於完結，但其實仲未完o架，今晚球彩台會為大家送上德國甲組聯賽附加賽次回合，凱沙羅頓主場迎戰賀芬咸，呢場波決定下季德甲一席。乙組第三位嘅凱沙雖然首回合作客輸1比3，但今晚返主場，莊家都開出佢哋要讓波，個盤都反映凱沙有機會扭轉局勢啦，見兩軍首回合非常落力大舉進攻，今場繼續揀入球大啦。

（有線61及64台周二凌晨2時30分直播）
賀芬咸係德甲失球王

大家對凱沙應該唔陌生，上季喺德甲排包尾降班，今季喺德乙最後第三名過終點，贏得升班附加賽資格。佢哋近年喺甲、乙組升升降降，實力其實同賀芬咸唔會差太遠，今場莊家開出凱沙讓平半，似乎仍有贏波機會。首回合落後兩球，今次返主場肯定主動進攻，入球重任繼續落喺33歲嘅艾迪素身上，但心急搶攻嘅同時，亦有機會被人偷襲，造就開大盤機會。

賀芬咸首回合於主場發威，踢箭頭嘅「德版尹光」羅拔圖法明奴表現上佳，有兩個入球兼主動參與進攻，另外禾蘭、「大哥」沙利荷域等都有良好狀態，今場唔愁無波入。問題係賀軍今季之所以搞到要護級，致命傷就係失太多波，三十四場聯賽失六十七球成德甲「失球王」，今場恐難保不失。

今次係呢個球季最後一次同讀者分享心水，好想多謝大家一路以嚟對呢個專欄嘅支持，希望再有機會透過《東方波經》再同大家見面，後會有期！