14億爭奪戰撐屈福特

猪拉多纳

足球史上最值錢嘅單場比賽今晚爆發，英冠升班附加賽決賽屈福特、水晶宮會師溫布萊，兩軍為1.2億鎊（約14億港元）殺上英超肯定搏甩髀！屈福特4強戰及時發飆，主力回勇戲劇性晉級，升班似天命所歸；近兩屆決賽又均由聯賽第3名球隊擊敗第5名，「優勝劣敗」攤路明顯，屈福特讓平半要上盤！

（廣東體育頻道周一晚10時直播）

雖然唔少評論指英超水準下滑，但依然屬全球最受歡迎聯賽，電視直播費、商業贊助等年年有增無減，據德勤會計師行發布數字，今晚勝方下季最少有6千萬鎊收入；就算做「升降機」後季跌番落英冠，都會再收另外6千萬鎊「降班費」，故呢場決賽總值14億港元，可謂價值連城。
水晶宮鋒力成疑

屈福特於4強戰遇李斯特城，次回合補時階段輸個12碼，被射入就幾乎肯定被淘汰；但前阿仙奴門將艾蒙尼亞神勇救出，廿秒後迪尼更入多粒，「黃蜂兵團」晉級簡直好睇過戲。該仗屈軍大將馬迪維達終結束多場入球荒，仲入夠兩粒；迪尼停賽復出亦都有士哥，諗都諗到依家球隊士氣勇達巔峰。領隊蘇拿亦諗得周到，日前特登帶隊到西班牙集訓，仲於熱身賽擊敗馬拉加，球隊狀態弗爆，今場值得秤先。

一般決賽，拿仁都鍾意揀下盤，水晶宮4強戰淘汰白禮頓，反擊極具效率，大將韋費特沙夏更梅開二度；教頭荷路維近四年三次帶隊殺入附加賽決賽，經驗非常豐富，戰鬥力有番咁上下。但英冠神射手格連梅利因傷缺陣，借將史提芬杜比又不能倒戈，荷路維逼住用70後前鋒韋白賴咸打單箭頭，你估沙夏仔係戴志偉，場場一個人打晒咩！

加上近年附加賽決賽「優勝劣敗」，上季韋斯咸贏黑池，前季史雲斯挫雷丁，都係眾望所歸賽果；仲要咁啱得咁蹺係由第3名打敗第5名，今次「三哥」屈福特贏波似冥冥中有主宰，讓平半博得過！