學生隊追擊小阿根廷人

猪拉多纳

阿King決定跳出歐洲，同大家講下南美波，聽朝阿根廷甲組聯賽有場下游大戰，學生隊主場硬撼小阿根廷人，前者逐漸走出低谷，近四場聯賽不敗兼未失一球，難得面對曳到冇朋友嘅包尾大幡小阿根廷人，必想食住個勢再下一城，主勝實屬不二之選。

（周二清晨5時10分開賽）

自從好波之人「小巫師」華朗去年六月掛靴後，學生隊在缺少核心下非常「唔適應」，首循環僅位列第九位，踏入次循環仲衰多兩錢重，頭十場聯賽未贏過拎得三分咁大把，好彩在前鋒杜雲沙柏達重拾射門鞋之後，學生隊表現重上正軌，近四聯賽取得三勝一和，最難得係全部保持清白之身，證明防線不穩嘅問題大有改善，今仗有中場主力謝拉拔刑滿復出，攻力更加有保證。

相反包尾嘅小阿根廷人已經連輸五場，眾將輸到頭耷耷冇晒信心，更恐怖係佢哋連還手之力都冇，成為次循環唯一一隊入波仍是個位數字嘅球隊，非常羞家，依家只得七分排喺榜尾，加上近六次造訪學生隊輸足五場，真係未踢已經腳軟，主W好路。
沙蘭迪聖羅倫素串W

另外，沙蘭迪兵工廠迎戰傷兵滿營嘅堤格雷，沙軍係次循環「主場王」，依家同榜首嘅紐維爾舊生差距唔大，為搶分必搏殺。至於四哥聖羅倫素近期前線主力干沙路華朗及皮亞迪腳風超順，主場對住九戰不勝嘅聖達菲聯，可謂「食生菜咁食」，主W有計。