洛賓要多得軒帥信到底

猪拉多纳

歐聯決戰精彩到癲！兩支德甲球隊踢出近年最賞心悅目嘅決賽，去到最後時刻至分勝負，成場波令人蕩氣迴腸。賽前好多朋友、球迷同球評家都撐多蒙特，皆因佢哋過分相信決賽下盤多嘅數據，同埋對多蒙特有利嘅預兆，太過陰謀論，Peter喺去年九月已經喺本報專欄貼拜仁奪冠，賽前更喺ontv德迷大派對豪言拜仁贏咗九成，事實勝於雄辯，誰說熱門唔識贏大賽？

冇錯，嚟到決賽場合，熱門拜仁所承受嘅壓力當然比本死無大害嘅多蒙特大，而且多蒙特亦好好波，喺一場過決勝負嘅場合絕對唔易踢，但內行人都明白，比賽輸贏最重要都係睇實力同付出咗幾多心機，拜仁決賽能夠頂住初段被動壓力，先求穩做好防務，再憑本身質素謀定後動，終於贏得最後實至名歸嘅勝利，大家唔好睇見多蒙特機會多，其實大家上半場鬧洛賓時亦睇到，拜仁亦逼到多蒙特防線多次犯錯，如果唔係洛賓唔會畀人話屢失良機啦！

洛賓最終成為拜仁大功臣，佢最需要多謝嘅係教練軒歷基斯嘅信心，喺比賽進行中，好多球迷甚至球評家都認為洛賓踢得曳，應該將佢換走，只有軒帥堅持對佢嘅信任，最終換來絕殺成果，證明軒帥識得嘅同睇到嘅，比絕大部分人都多，睇足球的確需要慢慢咀嚼整個過程，老帥成就非凡唔係浪得虛名。
從無偏愛 拜仁例外

Peter向來只擁護兩支球隊，一支係NBA嘅洛杉磯湖人，另一支係職棒嘅紐約洋基，睇咗幾十年足球，向來都係邊隊踢得好讚邊隊，冇一隊一心一意鍾愛嘅足球隊，不過今年嘅拜仁誠屬例外，由一開始我就認定佢哋必將成功，佢哋喺早兩季實力已經相當強橫，今季更喺每個細節做到最好，將缺點變成優點，由教練到球員個個都願意付出所有，佢哋嘅背景同實力，足夠承受好多外界認為會令佢哋輸波嘅元素，才能不斷克服困難，呢隊拜仁係Peter多年來睇過嘅球隊中，最令人欣賞同可以從中學得最多嘢嘅一隊，所以我至期待佢哋每一場比賽，亦一啲都冇令我失望，拜仁已經成為我最鍾愛嘅足球隊。
金句：誰說熱門唔識贏大賽