德附次回合凱沙「大」戰賀芬咸

猪拉多纳

近期所有德粉都將焦點放晒喺歐聯決戰上面，但唔好忘記仲有場德甲附加賽一樣打甩髀！首回合主場贏3:1嘅賀芬咸，今晚次回合作客凱沙羅頓，雖然賀芬咸有2球優勢，但佢哋最強嘅武器就係喪攻，對家凱沙亦要盡地一煲，1.72倍入球大抵撐。

（有線61、64、201及203、廣東體育周二凌晨2:30直播）
賀芬咸太倚賴越位陷阱

凱沙表面上陷於絕路，但其實佢哋都仲有本錢反勝殺上德甲。單係今季聯賽合共轟入30球嘅艾迪素同賓查古，已經係令人聞風喪膽嘅前鋒組合，仲有件綽號「火箭炮」嘅奧地利前鋒賀化做後上王，呢個進攻三叉戟絕對有睇頭。事實上，睇番呢班波近5次主場賽事有4場入3球或以上，火力咁強，睇怕賀芬咸都要預咗失波。

查實賀芬咸季尾之所以能夠死裏逃生，全靠一班中前場球員爭氣，尤其係波斯尼亞中場沙利荷域，呢位指揮官喺德甲煞科戰單天保至尊，到附加賽首回合又貢獻助攻，根本唔使驚賀芬咸冇波入。只可惜阿占認為呢班波嘅守將質素麻麻，最大鑊係條防線過分依賴越位陷阱裝對手，一個唔好彩旁證走漏眼就好易出事。既然兩軍入得又失得，今鋪梗係玩「大」佢啦！

最後，阿占要多謝咁多位《太陽報》嘅老友記支持，今季完結，占仔記亦稍事休息，後會有期，祝大家繼續贏到開巷！
首回合：凱客負1:3

頂占筍盤：賀芬咸（入球大）