聖達菲再做大贏「加」

猪拉多纳

自由盃8強次回合開打

雖則話重賞之下必有勇夫，不過秘魯勁旅皇家加斯拿素聽朝喺南美自由盃8強次回合作客哥倫比亞班霸聖達菲，想話攞到球會開出嘅435萬港紙晉級獎金，睇怕都係有心無力。首回合排錯陣主場輸1:3嘅加斯拿素，家陣形勢被動焗住喪攻，防線難免暴露漏洞，隨時大敗多場都唔出奇，捧2.15倍「讓球主勝」！

（開賽時間：周三早上9:00）
加斯拿素主帥死撐冇排錯陣

皇家加斯拿素上星期喺主場輸波，講真都幾令人意外，事後唔少秘魯傳媒都將矛頭直指主帥費迪加西亞，話隊波不嬲踢開4人防線，上仗竟然無情情轉打3中堅，結果搞到出事，費帥事後解釋變陣原因，係因為佢想博一博，踢多件前鋒希望盡快鎖定勝局喎，仲死撐自己係冇錯添，以呢位教練嘅料子，今鋪會唔會又變陣？定係還原踢番442？力奇唔知，唯一可以肯定嘅，咪就係個陣變來變去，球員無所適從囉！

當然，球會雖然一方面強調唔會炒費迪加西亞，但同時為咗氹番球迷，就向球員開出150萬秘魯新索爾（約435萬港元）晉級獎金，希望班手足可以踢番爭氣波，反勝晉級。不過咪話力奇潑佢哋冷水，上仗喺自己地頭都贏唔到，今鋪又憑乜開客W呀？

聖達菲目前排喺哥倫比亞聯賽榜榜首，實力有番咁上下。最重要係呢班波主場威力超勁，由分組賽起至今自由盃4戰，取得3勝1和佳績，當中除咗話16強砌低過巴西勁旅甘美奧，分組賽仲喺主場贏過皇家加斯拿素2:0，今仗原班人馬再戰，力奇睇唔出加斯拿素有扭轉形勢嘅本事囉！

首回合：聖客勝3:1
自由盃賽制

採主客兩回合淘汰制，今輪係8強次回合賽事，若兩回合總比數賽和，以作客入球較多一方為勝，再和就喺次回合90分鐘後，互射十二碼決定晉級球隊。