聖達菲敲細抵過W

猪拉多纳

南美自由盃展開8強次回合，明早上演哥倫比亞球隊聖達菲主場對秘魯球隊皇家加斯拿素，聖達菲首回合作客輕鬆贏3比1，可見實力明顯凌駕對手，晉級機會相當樂觀。不過亦因為主隊已有兩球在手，唔需要急於求勝，主W僅1.38倍實在唔抵玩，「讓球主勝」風險甚高。考慮到皇家加斯拿素攻力疲弱，難以咬入聖軍，建議揀選1.85倍入球細。

（周三早上9時開賽，馬會網上文字直播）

兩隊都算有緣，分組賽被抽入同組，8強又碰面，講到成績聖達菲佔上風，雙方今屆三次交鋒，聖軍取得兩勝一和，包括上周中首回合贏3比1，期間一度領先三球，之後先至畀皇家加斯拿素破蛋，贏得非常輕鬆。聖達菲今仗有主場之利，相信可以控制戰局，問題係佢哋已領先兩球，冇必要主攻，否則一旦被對手反擊得手，只會得不償失。預料佢哋會控球在腳，「歎慢板」保勝果，確保晉級。
皇家加斯拿素作客腳軟

皇家加斯拿素冇得揀，應會豁出去一搏，但佢哋入波能力曳，近四次作客入得兩球。皇家加斯拿素分組賽作客聖達菲，亦入唔到波，以0比2敗陣，有辦畀大家睇，今仗想攻破刻意「拉布」嘅聖達菲大門，恐怕難上加難。相信今場入球數字都係一球起、兩球止，細盤屬不二之選。