撐英格蘭求愛成功

猪拉多纳

主場換新衫 強陣恰細佬

曼聯、車仔坐鎮主場，對史篤城、諾域治之流，贏一粒又點夠皮？國際熱身賽英格蘭於溫布萊鬥愛爾蘭，主隊雖有謝拉特、韋舒亞等缺陣，但陣中仍粒粒皆星；領隊鶴臣逢熱身賽必攻，愛爾蘭陣中則充斥二打六，今戰嘅牌面同卡士直情等如英超新特蘭作客紅魔鬼，加上「三獅兵團」今仗將首次換上一剔牌新戰衣出擊，當然想贏波攞頭彩，好向贊助商交代，強捧「讓球主勝」！

（now 635周四凌晨3時直播）
踢熱身賽唔使忌住

領隊鶴臣上任以來，於正式賽事先保守，近期喺世界盃外圍賽就打和黑山、波蘭、烏克蘭；但於熱身賽就開放得多，作客負瑞典2比4，主場就贏巴西2比1，今次又於福地出擊，對手仲要係熟到爛嘅「細佬」，鶴臣必叫大軍全力殺敵。雖然之後要到里約熱內盧鬥巴西，但呢種同室操戈大戰唔贏唔得，最重要係今次國際賽期，「三獅兵團」唔使踢正式賽事，英軍冇留力之理。

英軍陣中傷兵唔少，隊長謝拉特、韋舒亞、湯卡華利同安祖卡路爾都因傷落選，前鋒韋碧克亦有微傷在身，早前就缺席操練。雖然中場人選買少見少，而且班球星又搏足一季，但今場牙骹味濃，相信可以激起班大帝鬥志，加上卡域克、林柏特同魯迪維爾都弗，而且朗尼、史杜列治、迪科爾、禾確特等都餓波，攻力依然能夠保持。打法方面，史杜、禾仔、迪科爾都夠快且狀態又弗，遇着客軍遲鈍防線，齋鬥跑都屈晒機。
愛爾蘭點只輸一球

英軍中堅菲臘積基爾卡話今場對碰似足一場英超賽事，因為對手人腳幾乎全數來自英倫聯賽，主要來自英超下游同英冠球隊。愛爾蘭前線會搵羅比堅尼或約拿芬禾達斯攻堅，佢哋一個老到嘔，一個就有勇無謀；中場占士麥卡菲、安東尼派京頓、占士麥堅恩等，分別來自韋根、諾域治及新特蘭，卡士同實力都遠不及英軍。愛爾蘭戰鬥力大不如前，領隊查帕東尼備受極大壓力，今仗肯定捱打，唔止輸一球。