波爾多搵伊維恩祭旗

猪拉多纳

爭踢歐霸必砌盡

今晚巴黎中立場爆發法國足總盃巔峰對決，由波爾多硬撼伊維恩。由於勝方可獲得來屆歐霸盃參賽資格，雙方為名為利一定搏甩髀，不過波軍射手迪亞巴堤腳風大順，加上有幸運星奧拜尼亞克助陣，點秤都秤先過護級分子伊維恩，冠軍有1.48倍，實屬穩陣之選。

（now714周六凌晨3時直播）

其實波爾多今季表現算唔錯，喺季中將首席射手高法蘭賣畀紐卡素、面臨嚴重入球荒嘅情況下，佢哋依然挺進歐霸十六強。儘管失去高法蘭，卻為潛力不俗嘅迪亞巴堤創造上位機會，呢位馬里射手歇冬後大爆發，喺各項賽事轟入十二球，包括近兩場法足盃淘汰賽均有「士哥」，成為殺入決賽嘅關鍵人物。這裡不得不提奧拜尼亞克，佢唔單止喺十六強對低組別球隊羅恩之役建奇功，仲係前屆決賽為里爾一箭定江山嘅功臣。

季尾伊維恩為護級出盡九牛二虎之力始上岸，今次就算想爭盃只怕有心無力。