意大利無「力」炒5粒

猪拉多纳

群星缺陣邊緣人考牌

主流聯賽煞科，今晚主菜係老牌勁旅意大利喺博洛尼亞主場，迎戰超級魚腩聖馬力諾嘅熱身賽。牌面主隊係實食冇黐牙，不過力奇刮到料，話意軍領隊柏蘭迪利會為嚟緊洲際國家盃玩試陣，出埋成班邊緣國腳，喺默契不足同火力減弱下，足智彩開盤意大利狠讓5球，都係捧2.62倍「讓客」好過。

（now633台周六凌晨2:45直播）

「藍衫軍」世界排名第8，贏過4次世界盃，聖馬力諾世界排名207，自88年加入歐洲足協至今踢咗117場波，只贏過1場，兩班波拍埋差幾遠唔使力奇多講，誇張啲講，意大利如果贏唔到波，班球迷暴動都似。不過佢哋能唔能夠大勝就係另一回事，事關意軍今次點兵31人，唔計因紀律問題踢走嘅羅馬前鋒奧斯華度外，淨番30個，嚟緊就要剔走7個，淨番23人去踢下周對捷克嘅世界盃外圍賽同之後嘅洲際國家盃，據聞主帥柏蘭迪利會用今場波試陣，考驗一眾邊緣國腳實力。
巴洛迪利 派路 保方統統唔踢

事實上，意軍賽前已經宣布前鋒艾沙拉維同巴洛迪利都會因傷缺陣，老將保方同派路今晚則獲准免役，其餘有份踢意盃決賽嘅迪羅斯、簡達華同門將馬捷迪亦放假一周，中場蒙杜利禾同守將巴沙利又有輕傷在身掛免戰牌。扣除呢班星級國腳之後，今晚擔正被重點考察就包括博洛尼亞中場邦拿雲度拉、卡利亞里前鋒馬高沙奧同森多利亞中場安德列普利等，睇完個出場名單你唔多認識咩？唔好怪自己，今季冇意甲波直播，唔識都唔出奇，不過要信佢哋可以贏到5球或以上，似乎牙煙啲囉！
聖馬力諾土炮孭飛

聖馬力諾呢邊，對上一次贏波已經係04年4月1:0贏列支敦士登，陣內除咗中場高賓尼喺意大利低組別聯賽搵食外，全部都係土炮，37歲隊長安迪施華算係最巴閉，累積國際賽入球都係得8個。老實講，望佢哋爆冷係冇可能，只係望佢哋死守唔好輸到阿媽都唔認得，齊齊為佢哋打氣啦！