美國等食德國C隊

猪拉多纳

歐洲主流聯賽結束，近期陸續有唔少國家隊賽事舉行，肥叔不嬲唔建議大家喺呢類場合搏殺，特別係國際熱身賽，嗰啲名牌國家隊球員搏足成季，已經唔多願踢太公波，如果係無關痛癢嘅賽事更加唔會搏，若然見呢類名牌隊讓得多，諗都唔使諗，反佢啦！

家陣冇乜波玩，肥叔都會同大家研究吓啲國際賽，德國今次派出C隊去美國，班行家個個都批死佢哋敷衍了事，上次德國對厄瓜多爾初盤讓一球、球半，開波前回到讓平半，點知德國失驚無神喺上半場發狂入四粒，搞到一地眼鏡碎。不過，厄瓜多爾下半場企穩陣腳攻足全場，德軍冇乜反擊力，已經露晒餡，唔好睇得太高！德國今次對美國只係小讓平半，個盤調整晒，美國主場好硬淨，今場可小試下盤，兼顧埋大盤。
巴西獵「英」挽形象

同日巴西主場對英格蘭，英軍上次熱身賽對愛爾蘭完全冇料到，畀英倫傳媒鬧到七彩，查實英軍不嬲都係名大於實，都唔明點解啲人對佢哋仲有期望。巴西踢熱身賽不嬲唔多肉緊，但佢哋下年要搞世盃，點都要搞好形象，幕後人心態唔同咗，今次對住英軍係騷哥利好時機，讓得多都唔怕，照捧上盤！

猪拉多纳