三獅騎呢怪「鋒」陣 擋唔住森巴兵

猪拉多纳

鶴臣冇大將 禾仔作箭頭

巴西大戰英格蘭，幾時都係充滿話題，今晚兩隊喺里約熱內盧踢熱身賽，好可能成為新經典。其實雙方今場都唔齊腳，但相比下英格蘭情況衰得多，甚至係「蜀中冇大將，禾仔作先鋒」，安排踢開翼嘅禾確特做中鋒，靠呢個怪「鋒」陣咁梗係捧巴西2.12倍「讓球主勝」！

（開賽時間：周一凌晨3:00）
改踢433中場創造力低

英格蘭日前只能夠喺主場以1:1打和愛爾蘭，惹嚟全國喪插，最慘係安祖卡路爾喺點兵期間已因傷退隊，史杜列治上場波又傷埋，加埋韋碧克打柴、朗尼扭計轉會影響表現，迪科爾好番後又未夠弗，據講領隊鶴臣喺操練嘗試搵禾確特做中鋒，希望靠佢嘅速度搵食。

雖然禾仔今季喺阿仙奴踢過中鋒表現唔錯，但聯賽後半段基本上已踢番老本行翼鋒，證明兵工廠教頭雲格都覺得佢唔係正中鋒材料。再講，由於阿歷士張伯倫未夠班，艾舒利楊格同艾朗連儂因傷冇入選，聽聞鶴臣打算用朗尼同占士米拿做433陣式嘅邊鋒，相當騎呢。

或者朗尼喺曼聯都做過類似工作，但表現就唔算出色，占士米拿更加係勤力有餘威脅不足，更弊係3人中場線林柏特、卡域克同菲爾鍾斯，拍埋一齊創造力低到得人驚，睇怕鶴臣都係想死守靠禾確特打反擊偷雞。
費特養傷 巴西保「大菲」唔衰得

另一方面，雖然前鋒費特尋晚證實肋骨裂咗，今場波肯定唔出得。但巴西教頭「大菲」史高拉利重掌森巴兵團後，頭炮就係作客以1:2不敵英格蘭，呢次返主場當然唔可以再失威，否則隨時未到出年世盃決賽周就要走人，足智彩主勝壓低到1.36倍唔係冇道理，贏波報仇唔成問題，想好分啲就玩「讓球主勝」啦！
巴西連開4場雙

巴西過去24次交手得11勝9和4負，入32球、失20球。

史高拉利回歸後巴西得1勝3和1負，首戰以1:2不敵英格蘭。
巴西連續4場開入球雙。

英格蘭近7場有6次半場領先、1次打和。
巴西隨時贏到尾捧「主主」

除咗主勝熱到爆，巴西對英格蘭「第一隊入球」都係得1.34倍，反映足智彩覺得巴西贏波同入波都係理所當然，如果大家對巴西「讓球主勝」冇足夠信心，咁可以考慮吓玩2倍主主，因為足智彩冇睇錯嘅話，只要巴西半場領先就好大機會開到「主主」益街坊。