岐阜冇人撐想贏都難

猪拉多纳

今日足智彩打頭陣嘅日（一）都幾好路，FC岐阜喺日乙主場對岡山綠雉，受讓都要唔過。今季岐阜長期包尾，連球迷都開始唔撐佢哋，根據統計，佢哋今季主場入座率勁跌33%，冇厘氣勢唔似可以翻身！

岐阜上季頭8場主場賽事，平均每場有4,270個球迷入場，相反，今季每場平均得3,326個擁躉助威，勁跌33%，證明佢哋開季以來得1勝4和11負，衰到貼地嘅走勢連球迷都唔撐。現時岐阜傷兵滿營，後衞森安洋文又要停賽，失去埋球迷支持，邊惡得出樣？

另一方面，綠雉有機會躋身前6名踢升班附加賽，當然唔會放軟手腳，特別係今季加盟嘅前千葉市原射手荒田智之，暫時喺聯賽攻入8球，依照佢季初嘅腳風，隨時連日乙神射手寶座都有得爭，對住包尾嘅岐阜梗係有得數就數啦！