舊生搏到氣咳難敵男生

猪拉多纳

阿甲聽朝繼續有好戲上演，男生隊喺主場對紐維爾舊生，受讓值得博吓1.8倍「讓球主勝」。雖然男生隊陣容嚴重不整，但紐維爾舊生近排連續3次硬撼小保加，球員嘅體能同心理狀態已超出負荷，作客出事唔奇。

（開賽時間：周一早上7:15）
男生贏往績

男生隊唔止傷兵唔少，仲有後衞靴蘭加拿同基洛加停賽，今場波有4個位出現變動，而且最近連續4場食白果冇波入，遭遇3連敗衰到貼地，拗頸揀「讓球主勝」會唔會太冒險？又未必喎，至少男生隊近6次對紐維爾舊生有2勝2和1負，完全唔輸蝕，加上休息時間比對方多幾日，有條件爆冷。

事實上，身處榜首嘅紐維爾舊生，最近因為兼顧南美自由盃已經踢到氣咳，佢哋喺8強兩回合計以0:0打和小保加，要靠互射12碼搞掂對手晉級，但計埋聯賽大勝4:0，其實舊生喺1個星期內已3次同小保加交手，完成任務心情隨時放鬆，追唔過喎！