墨西哥雙箭剝牙

猪拉多纳

擺大個頭博開齋

世界盃中北美洲區外圍賽，兩支難兄難弟交手，牙買加主場對墨西哥。雙方在第四圈踢咗三輪賽事，仲未開齋，難免開始焦急，尤其係區內「大佬」墨西哥絕對接受唔到出局嘅噩夢，今仗勢必擺大個頭，力爭打開勝利之門。牙買加攻力差，一味死守求和，但久守必失，抵擋唔到墨西哥一對箭頭查維亞靴南迪斯及杜斯山度士，簡單要1.72倍客勝。

（周三早上9時35分開賽）

中北美洲區一向屬於美國同墨西哥天下，來到第四圈，估唔到墨西哥竟然成為兩支未贏過嘅球隊之一，惹來國內傳媒及球迷炮轟。如果今仗贏唔到包尾嘅牙買加，領隊迪拿托利隨時烏紗不保，必定派強陣搶3分。查維亞靴南迪斯及杜斯山度士過去一季在自己聯賽都有上佳發揮，最重要係球季已經結束，唔需要顧慮球會壓力，專心搏殺之下，應可改善墨西哥之前三場入球偏低嘅問題。
牙買加死火勢捱打

根據歷史，牙買加往往在中北美洲區第四圈外圍賽止步，佢哋只曾於1998年打入世界盃決賽周，現時戰績不濟屬於意料之內。牙買加國腳主要喺本土及美職搵食，就算部分去歐洲落班，多數只能効力二線聯賽英冠及英甲球隊，最威嘅前鋒麥奇利及後衞馬里亞柏，下季都隨雷丁降落英冠，人腳質素甚為參差。

牙買加最大問題係唔識入波，近四仗僅得一球進帳，墨西哥睇穿呢個弱點，更加可以放心搶攻，只要把握一兩次機會，牙買加就冇得翻身。