球味香濃客勝必捧

猪拉多纳

消夜好介紹：三獅會意粉

U21歐洲國家盃開打，率先上演兩場A組賽事，其中凌晨消夜時段送上一客「三獅會意粉」！由「小三獅兵團」英格蘭U21火併「Spagetti部隊」意大利U21，兩軍同屬奪標熱門，因此踢落競爭性高，唔使擔心冇球味。英格蘭陣容今仗未算完整，唔少具質素球員都因各種原因無法參加今屆賽事。相反意大利陣中，部分成員本身早已成為大國腳，論級數同經驗都贏晒，客勝必捧啦！

（now 633及635周四凌晨2時30分直播)
英格蘭：傷停嚴重冇星孭飛

本來英格蘭U21可點選更強勁陣容爭標，奈何領隊皮雅斯唔夠牙力，球會一句話唔放人，「阿皮」就冇聲出。第二係陣中「傷停」情況嚴重，例如今季踢到曉飛嘅韋根球員卡林麥馬拿文同修咸頓嘅勞基梳爾都因傷缺陣，而昆士柏流浪翼鋒安祖斯唐辛，就因涉嫌賭波而被除名。加埋「新紅魔」球員韋費特沙夏因足踝受傷缺操，「小三獅兵團」人腳買少見少。

據英國《太陽報》透露，韋費特沙夏今場可能要打針先至勉強落到場，再加埋効力黑池兼名將之後湯馬士恩斯停賽，英格蘭除咗利物浦嘅佐敦軒達臣外，真係冇乜邊個孭到飛，今仗預咗要打下風波。
意大利：多大國腳經驗贏晒

反觀意大利U21就唔同嘞，佢哋喺「小歐國盃」成績極佳，曾6次打入決賽並5次奪標，睇番陣容，當中恩斯治尼、馬高華拉堤、迪斯度、費奧倫斯及利物浦前鋒波連尼等早已經入選過大國腳，作戰經驗及級數都比對手英格蘭優勝。要數意大利焦點球星，一定係協助巴黎聖日耳門贏聯賽冠軍嘅馬高華拉堤，佢唔單止喺法甲賽場踢得出色，於歐聯演出一樣唔失禮，絕對有能力挑戰今屆最佳球員大獎。意大利人腳唔差，客勝好路。

猪拉多纳