俄國射手歸位大鬥荷蘭

猪拉多纳

另一場B組賽事，荷蘭U21鬥俄羅斯U21。俄羅斯U21首仗全失三分，為保出線希望一定全力爭勝，兩大射手史莫洛夫及迪沙高耶夫踢完大國腳比賽已歸隊，攻力大增之下，預料會和踢法進取嘅荷蘭U21合演入球騷，1.77倍大盤係投X首選。

（周一凌晨零時開賽）

俄羅斯U21首場分組賽被西班牙U21圍攻，結果力抗至完場前失守輸波，俄軍踢得咁被動，某程度係由於前線主力史莫洛夫及迪沙高耶夫入選大國腳所致。史莫洛夫於今屆外圍賽個人攻入7球，係隊中首席射手，迪沙高耶夫就係上屆歐國盃神射手之一，對球隊重要性可想而知。如今兩人踢完世盃外圍賽已經歸隊，今仗可落場搏殺，對要爭勝保持出線機會嘅俄軍嚟講自然係好消息，預料唔會好似上場咁一味死守。
荷蘭入得又失得

荷蘭U21今次選咗多名大國腳入伍，無論實力、經驗都比同組對手稍勝一籌，首仗贏德國U21 3比2亦十分對辦，不過球隊曾經喺領先兩球情況下一度被追成平手，防線未算太穩健，面對有主力回歸嘅俄軍鋒線好難唔失波。幸好球隊中前場好手如雲，盧克迪莊、阿當馬希、韋拿杜姆及雲堅基爾上場都交到功課，只要發揮水準足以彌補後防過失。由於荷軍最後一輪要硬撼奪標熱門西班牙U21，為免夜長夢多，今仗目標一定係全取3分，估計兩軍都會大踢進攻足球，有利開大。