多哥 喀麥隆死火和波格

猪拉多纳

世盃外圍賽重心今日轉到非洲區嗰邊，當中喺I組3戰未嘗一勝嘅多哥主場惡鬥榜首喀麥隆。多哥有前鋒艾迪巴約扭計未必踢，喀麥隆又有隊長伊度奧打柴，既然兩軍都缺少入球之匙，不妨冷敲2.85倍和。

（開賽時間：周日晚11:30）
艾迪巴約扭計 伊度奧打柴

多哥近期麻煩多多，蘭斯中場阿耶迪同埋門將阿加沙先後退隊，同領隊不和嘅艾迪巴約又未知會唔會答應國家隊徵召，對士氣肯定有所影響。尤其冇咗射手艾迪巴約喺前線Hold波、做掩護，得番南特翼鋒沙治加比一個單打獨鬥，攻勢難免變得單調，要打開勝利之門似乎冇乜計。

至於「不屈雄獅」喀麥隆同樣面對死火問題，皆因伊度奧未傷好，最慘係連助攻力唔曳嘅熱刺左閘伊高圖同告打柴。再者，啱啱喺5月落實執教喀麥隆嘅德國籍新帥禾卡，可唔可以喺咁短時間內同球員建立好默契實屬疑問，加上今場波又唔係非勝不可，作客踢得保守啲並唔出奇。