紐維爾舊生菲常值博

猪拉多纳

今日得四場波咁大把，阿King決定將重心放喺聽朝上演嘅阿甲，其中紐維爾舊生主場對聖達菲聯，可謂強弱懸殊，前者位列次循環榜首，力爭冠軍殺入總決賽，戰意高昂，相反篤定降班嘅聖達菲聯傷兵一大籮，近況又曳，紐軍勢必搵佢哋祭旗，「讓球主勝」非常值博。

（周二早上6時10分開賽）

今季阿甲改制，由首、次循環冠軍進行一場過決賽，決出聯賽總冠軍。依家「一哥」紐維爾舊生氣勢如虹，喺剩番三輪情況下，領先拉魯斯及河床三分，由於自由盃四強去到七月先舉行，佢哋毋須應付兩線作戰，可以集中火力專攻聯賽，前鋒伊拿斯奧史高高更以十球排喺射手榜榜首，腳風咁順，必想食住個勢，盡快鎖定次循環冠軍喇。
學生鬥拉魯斯細盤可靠

至於聖達菲聯已經肯定下季乙組再見，軍心渙散亦在所難免，最慘係傷兵滿營，幾名主力如法蘭蘇亞、蘇比根、迪亞高查拉上陣成疑，面對來勢洶洶嘅紐維爾舊生，隨時未踢先怯，輸多幾粒都唔奇，「讓球主勝」捧得過。

另一場聖羅倫素迎擊包尾大幡小阿根廷人，以聖軍近八仗未輸過嘅勢頭，應可輕取對手。最後學生隊狀態不錯，連續五場冇失波及開細盤，防線固若金湯，遇上熄晒火嘅拉魯斯，細盤有計。