伊朗睇定黎食 預咗少交收

猪拉多纳

世界盃外圍賽亞洲區A組，伊朗主場對黎巴嫩，由於同組排名前兩位球隊南韓同烏茲別克今輪交鋒，起碼一隊會失分，換言之伊朗只要全取3分，就可以進佔前2「直接出線區」，爭勝決心極強。不過伊朗攻力差，相信炒唔起引入歸化球員、級數「升呢」嘅黎巴嫩，主W熱爆無投X價值，「讓球主勝」有暗湧，建議要2.3倍入球細。

（now 670周二晚11時30分直播）

悶蛋足球踢出佳績
伊朗自從名牌射手戴伊退休後，國際賽成績持續不振，兩年前由前皇馬主帥奎雷斯接手領軍，大踢穩陣足球。佢哋第4圈6場外圍賽，只入3球失2球，每場總入球都唔超過「1」，全部開細，簡直悶死人。不過球隊成績比以往進步，現時僅少南韓及烏茲別克1分，反超前機會樂觀。既然「悶蛋足球」奏效，當然要繼續沿用，今仗就算贏，都係小勝居多。

黎巴嫩靠歸化外援
黎巴嫩表面上世界排名131位，但實力絕對唔可以睇小，事關佢哋積極推行歸化政策，引入「外援」提升實力。中場馬達本身係科特迪瓦人，依家喺西班牙低組別球隊搵食，前鋒莫斯利則屬漢堡青訓產品，門將阿巴斯哈辛効力瑞典超球隊艾夫斯堡，質素一啲都唔差。

黎巴嫩上仗領先南韓大半場時間，直至補時先至被逼和1比1，表現非常頑強，有力抵擋伊朗攻勢。