日本Hea鬥伊拉克細盤好路

猪拉多纳

世界盃亞洲區外圍賽B組賽事，日本踢例行公事心不在焉，於中立場卡塔爾鬥伊拉克或有暗湧，入球唔慌多！日本已成功殺入巴西世界盃決賽周，今仗屬例行公事，洲際國家盃又即將開波，料今仗會有唔少副選落場，加埋隊長長谷部誠停賽，今場分分鐘係悶戰一場，捧細為妙。

（now 671周二晚10時30分直播）

日本上場主場對澳洲，狂攻下竟然先失波，好彩最後本田圭佑轟入12碼，成功逼和「袋鼠兵」，提早取得出年世界盃入場券。日本實力喺亞洲超晒班，但隊中外流球員，搏足一季已經好攰，所以於外圍賽較Hea值得原諒；依家已經達標，今戰一定勒住保留體力，因此咪使旨意班波為砌盡。

料收起外流猛將
加上今仗中場長谷部誠坐波監，本田仔又有傷，洲際國家盃仲有幾日就開波，首仗仲要鬥巴西，領隊沙哲朗尼大條道理收起香川真司等主力，戰鬥力難免受削。伊拉克明顯唔夠班，現於B組排包尾，6戰入4球失6球，其中5場開出細盤，相信今場都唔會例外。