洲際盃10號仔起革命

猪拉多纳

尼馬 法比誓踢身價波
「足球王國」10號旗飄揚！自古以來，10號都係好波同靈魂球員嘅象徵，漫畫入面有戴志偉，真實世界就有比利、馬納當拿兩位殿堂級球星。今屆巴西洲際國家盃同樣有8位10號仔馳騁球場，但佢哋距離成為「隊魂」仲差一步。以尼馬、法比加斯、基奧雲高同香川真司為首嘅一眾「10仔」，同樣要靠洲際盃呢個大舞台證明國家隊價值，究竟邊個會踢出身價？邊個會「十吓十吓」？大家一於拭目以待！

身為「東道主10號仔」，啱啱過檔巴塞嘅尼馬無疑係今屆洲際盃主角，呢位「新比利」喺巴甲係踢到曉飛，不過去到國際賽舞台就似乎仲未孭到飛，齋睇近兩場巴西鬥法國、英格蘭嘅國際賽，尼馬都係行行企企居多，表現明顯未達球迷預期。10號唔係人人着得起，要做巴西10號、即係做比利接班人就更加大壓力，比利早排就批評尼馬喺國際賽冇料到，尼馬強勢加盟巴塞之後亦受到唔少質疑，話佢名大於實，今次洲際盃正正係佢省靚招牌、載譽登陸西甲嘅黃金「餐士」。

另一支奪標熱門西班牙，今次由法比加斯孭起10號重擔，巴塞喺今屆歐聯決賽畀拜仁技術性擊倒，身為巴塞一分子嘅法比仔，為國家榮辱點都要幫「鬥牛國」重振Tiki-Taka踼法聲威，況且隨住尼馬來季入「營」，法比加斯喺球會嘅位置進一步受到威脅，為前途着想肯定要做番齣好戲。

香川真司 基奧雲高「騷哥利」
同樣要證身價嘅，仲有日本嘅香川真司同意大利嘅基奧雲高。「極品壽司」自去季改投曼聯之後即刻跌晒Watt，無論球會定抑或國家隊都突然死火，昔日多蒙特恩師高普之前就話，睇見香川喺「紅魔鬼」唔受重用感到心如刀割，呢位日本王牌唔想令佢老人家失望嘅話，真係要諗諗計。至於被揶揄未夠料就扮大哥着10號嘅基奧雲高，今季喺祖雲達斯終於踢出代表作，下一步梗係要將好表現帶到去國際大舞台，令批評者收口。

10號仔逐個睇：意大利•基奧雲高
年齡：26歲

効力球會：祖雲達斯

位置：進攻中場、翼鋒

國家隊上陣次數/入球：15次/0球

簡介：以輕巧靈活見稱，盤扭技術出色，出道初期被譽為「金童」迪比亞路接班人。

巴西•尼馬
年齡：21歲

効力球會：巴塞隆拿

位置：前鋒

國家隊上陣次數/入球：34次/20球

簡介：有「新比利」美譽，腳下功夫毋庸置疑，曾連過五關建功最為人津津樂道。

日本•香川真司
年齡：24歲

効力球會：曼聯

位置：進攻中場、翼鋒

國家隊上陣次數/入球：44次/13球

簡介：傳球精準及擅小組入楔，後上埋門觸覺敏銳，為英超史上第一位連中三元嘅亞洲球員。

墨西哥•杜斯山度士
年齡：24歲

効力球會：馬略卡

位置：進攻中場、翼鋒

國家隊上陣次數/入球：65次/14球

簡介：職業生涯路途坎坷，於巴塞及熱刺始終未能站穩陣腳，今季効力馬略卡更要降班。

西班牙•法比加斯
年齡：26歲

効力球會：巴塞隆拿

位置：中場

國家隊上陣次數/入球：80次/13球

簡介：精準傳球及上佳閱讀球賽能力最為煞食，隨沙維年紀漸大上陣機會有望增多。

烏拉圭•科蘭
年齡：34歲

効力球會：國際體育會

位置：前鋒

國家隊上陣次數/入球：98次/33球

簡介：射門觸覺敏銳，處理罰球亦極具威脅，近年墮後擔任校炮角色如魚得水。

尼日利亞•約翰米基爾
年齡：26歲

効力球會：車路士

位置：中場

國家隊上陣次數/入球：48次/3球

簡介：為國家隊不可或缺嘅綠葉，出腳攔截及封阻對手進攻路線功夫相當到家。

大溪地•尼古拉斯華拿
年齡：29歲

効力球會：AS Dragon

位置：中堅

國家隊上陣次數/入球：11次/2球

簡介：罕見10號仔中堅正好反映佢對大溪地嘅重要性，曾外流法國踢蒙彼利埃預備組。