4強大戰冇得留 意荷小兵做大戲

猪拉多纳

除咗洲際國家盃之外，今晚兩場喺以色列舉行嘅U21歐洲國家盃4強大戰亦相當值得留意，呢班小將過幾年或者就係球壇主人翁。其中意大利U21對荷蘭U21，雙方都有多位已晉升大國腳嘅早熟中前場球員助陣，進攻技術超班。最重要係後生仔初生之犢不畏虎，踢淘汰賽照攻燃燒青春，加上兩軍上仗同樣畀主力輪休，養精蓄銳搏殺，更加有利開入球大。

（now 633及635周日凌晨2時30分直播）
小橙軍入得又失得

意、荷U21今屆表現出色，同樣踢咗兩場分組賽，就提早取得出線權，雙方上仗都畀一批主力休息。A組首名意軍最後一仗對挪威，收起巴黎聖日耳門中場大腦馬高華拉堤、射手恩莫比尼、快翼恩斯治尼，前鋒加比亞甸尼及羅馬中場費奧倫斯則喺下半場披甲，擺明留晒力。呢支意大利最煞食地方係進攻人腳鼎盛，即使兩位曾經為大國腳披甲嘅前鋒波連尼、迪斯度，都只能屈居後備，一旦球隊落後，領隊文基亞有充足籌碼，即時「撳掣」爭取反勝。

荷蘭U21領隊普迪仲誇張，上仗竟然收起十一位正選，最終吞西班牙三蛋，並唔代表球隊真正實力，反而證明佢哋信心十足，即使次名出線鬥意大利亦未驚過。其實亦好難怪普迪咁招積，皆因陣中人才濟濟，有十二位球員屬大國腳，除咗一早打出名堂嘅前鋒盧克迪莊，仲有上季荷甲轟入14球嘅中場韋拿杜姆，佢今屆已有兩球進帳，演出非常Sharp醒。撇開上仗派副選冇波入，「小橙軍」首兩場正常發揮，共攻入8球，火力驚人。問題係荷蘭防守麻麻，遇上進攻人才輩出嘅意大利，更難保清白之身，1.92倍大盤屬首選。