撐西班牙旗開得勝

猪拉多纳

狂牛發惡撞散烏拉圭

假巴西舉行的洲際盃明早爆發「歐美大戰」，B組西班牙硬撼烏拉圭。「狂牛」近年於球壇呼風喚雨，世界盃、歐國盃錦標全部擸晒，唯獨係未捧過洲際盃，因此全隊對呢座獎盃充滿飢渴感，希望完成國際賽事大滿貫，鬥心必堅。雖然烏拉圭有前線三叉戟卡雲尼、蘇亞雷斯同科蘭壓陣，但近期表現跌Watt，相信「鬥牛士」要衝散對手贏波冇難度，主W穩開。

（無綫明珠台及高清翡翠台周一早上6時直播）
矢志爭奪唯一未贏大獎

西班牙貴為球壇霸主，近年締造多項紀錄，包括上年歷史性蟬聯歐國盃。不過，未到手的東西始終係最珍貴，對於幾乎擸盡成年隊伍各項大賽錦標的「狂牛」而言，上屆於洲際盃4強意外地輸畀美國，至今仍耿耿於懷，今屆誓要一嘗捧盃滋味。

講到雪恥，就不得不提陣中的巴塞球員，上季該隊喺歐聯4強慘吞拜仁7蛋出局，畀人批評「狂牛王朝」已經沒落，沙維、恩尼斯達同法比加斯一直谷住道氣，當然想喺洲際盃呢個大舞台做番齣好戲，向世人證明佢哋嘅「世界一哥」地位。
科蘭老退 三叉戟戰力減

烏拉圭挾南非世盃殿軍兼2011年美洲國家盃盟主威勢參賽，惜防線大哥盧根奴同射手科蘭漸走下坡，後者於巴甲國際體育會完全冇貨交，一對箭頭卡雲尼同蘇亞雷斯的確有料到，但兩人均受轉會傳聞困擾，未必能夠專心應戰，因此唔好睇得三叉戟太高。況且後防嘅馬田卡沙利斯同艾華路佩雷拉有經常助攻回唔切防嘅問題，前面入幾多都唔夠後面輸啦！

最重要係烏拉圭近期喺世盃外圍賽戰績唔掂，對住智利、巴拉圭、厄瓜多爾等隊伍統統失分，最恐怖係對住玻利維亞都輸1比4，遇上氣勢勇猛嘅西班牙，都係凶多吉少。