好香港形勢有利

猪拉多纳

　　暫時阿航領先告東尼3場頭馬，三四位蔡方則落後4及6場。論形勢，阿航一片大好，事關告東尼最近三幾期賽事好似唔多對路，經常雷聲大雨點小，反之，阿航密密執，成日有頭馬進帳。而今期葉廐又有成手馬在陣，且看會否進一步拋離對手。

　　第二場四班1200米。「好香港」跑來跑去未贏，在沈廐如是，轉到李易達一樣冇變，馬運真係唔多好，不過，呢匹馬演出準係事實，在谷草短途更加擅長。由於今場有好多快馬在陣，數得出至少有三四匹，對於後上跑法嘅佢，形勢夾得啱。講到鬥志就不在話下，一定好恨贏，只要唔係搏完一場散咗，今次有力打開勝門。

　　第七場三班1200米。「安琛」連續兩場跑入三甲，均在谷草短途，蔡神仙一直唔轉路程及場地，專注讓此馬不斷跑此程，可能佢認為隻馬暫時進度未足以在田草逞強，與其渡江做炮灰，不如喺細場搵食好過。既然近績準，韋達跑番，可作馬膽。

　　第八場二班1650米。「歡樂時光」最近數仗表現唔算太好，但又唔係輸得遠，係進度回落？評分盡了？體力不夠？真係唔多清楚，之不過，由田草轉戰谷草，仲邊有老虎在場！而能夠在1600米上名，谷中一哩唔應該有難度，值得看重。

　　點买法

　　「好香港」係全晚最鍾意獨贏對象，但先旨聲明，捧得太熱唔多值，因為始終係處女馬，3倍已係底線！而重心場次揀埋同一場，用呢匹後上馬做膽，配腳拖幾匹前領馬+§:。