南韓撼古巴捧入球細

猪拉多纳

缺首席射手文昌鎮

世青盃今晚土耳其點起戰火，古巴U20喺B組對南韓U20，唔似偷到雞。今次係古巴U20首次參賽，感覺上好神秘，打法未曝光唔易啃。另一方面，南韓U20嘅首席射手文昌鎮冇入選，未必炒得起對手，玩入球細好過。（無綫明珠台及TVB網絡電視01頻道、now801、中央5台周五晚11:00直播）
古巴U20火力有限

雖然古巴U20喺U20中北美洲國家盃，曾經喺8強以2:1爆冷淘汰哥斯達黎加U20，問題係佢哋晉級後，4強對美國U20淨吞兩蛋，季軍戰對薩爾瓦多U20以0:1落敗，證明火力相當有限，作為入球希望嘅前鋒美基雷耶斯，似乎只係識喺弱隊身上入波，靠佢孭飛未必攻得破韓國後防，有利開入球細。

另一方面，南韓U20喺上年嘅U19亞洲盃決賽，飽食驚風散以互射12碼擊敗伊拉克U19，而且今次大軍名單中，唯一外流球員係日職神戶勝利船後衞姜允求，牌面非常普通。最弊嘅係，上年喺U19亞洲盃攻入4球嘅浦項制鐵射手文昌鎮，並冇歸隊助陣，好多入選球員仲讀緊大學添，要求南韓U20大炒並唔實際。