洲際盃勝在冇「驚輸的足球」

猪拉多纳

洲際國家盃受關注程度，唔及世界盃同歐國盃，但睇落又幾有味道，各隊都踢得好放，唔似參加世界盃同歐國盃咁，為爭取最高殊榮而踢「驚輸的足球」。巴西、西班牙、意大利演出固然佳，烏拉圭、日本、墨西哥、尼日利亞表現亦唔差，甚至連魚腩大溪地都令人驚喜。

東道主巴西今屆開局順，兩場分組賽都一早取得領先優勢，加上領隊史高拉利搵埋「防守大師」彭利拿入教練團，改善後防質素。「森巴兵團」攻守兼備，下定決心要捧盃。
巴意出線以和為貴

西班牙正副選人腳都強，意大利領隊柏蘭迪利就深受球員支持，踢得好放，反勝日本4比3，非常精彩。大溪地不畏縮，導致兩仗失16球，造就賽事總入球數字大增。展望爭標機會，Peter認為西班牙最大，其次係巴西，跟住屬於意大利。

至於今晚兩場波，巴西同意大利已取得出線權，今仗交手會留有一手，以免被對方洞悉虛實，應會以和為貴。另一場日本對墨西哥，雙方實力接近，但要留意墨西哥仲要兼顧下月初美洲金盃，唔會去盡，日本可以秤先。
金句：洲際盃三大好處，踢得放、入波多、冇悶場