不死鳥搶W予取予葵

猪拉多纳

日本球員勁搶手，連日乙球隊京都不死鳥都被挖走一員猛將，超新星久保裕也將轉投瑞士球會年青人，月尾就會走人，不死鳥冇咗呢個首席射手都幾頭痕，惟有喺呢個年輕前鋒臨別前將佢榨乾榨盡，今輪主場對水戶蜀葵會傾力搏殺，主勝穩陣！　　　　

（周六晚6時開賽）

久保裕也產自京都不死鳥青年軍，一早被視為超級新星，佢兩年前正式轉戰職業足球，上年曾入選日本國家隊，家陣只得19歲仔，真係後生可畏。之前多番盛傳有國外球會睇中佢，年青人最快出手簽下呢位小將，依家所有嘢傾掂晒，佢踢埋下輪對櫪木SC場波就會離隊。京都不死鳥管理層見到久保裕也有好發展，當然高興，但佢哋同時好唔捨得呢位球星，佢現時喺聯賽為球隊貢獻7個士哥，屬隊內首席射手，大軍雖然仲有原一樹、三平和司同宮吉招實等攻擊球員在陣，但質素始終都唔及久保仔，趁佢未離隊，嚟緊兩場要肉緊啲搶分爭升班。
蜀葵攻力弱爆

水戶蜀葵近期出現入球荒，對上3場聯賽零士哥，遇上日乙兩大勁旅大阪飛腳及神戶勝利船同樣淨吞兩蛋，今次面對另一前列份子不死鳥情況亦唔樂觀。蜀葵倚重老牌球星鈴木隆行爭取士哥，但佢今場要坐波監，令大軍攻力弱上加弱，今場睇怕都係無力反抗。