柏雷素爾爭盃仔斷箭

猪拉多纳

日本聯賽盃八強另一場廣島三箭主場對柏雷素爾，柏軍今季喺聯賽唔多掂，惟有疊埋心水轉型做盃賽王，但佢哋喺亞冠盃荊棘滿途，為免冇成績交差，盃仔都唔會放過，今場作客硬撼三箭打真軍有得揮，博「讓球客勝」！

（周日晚6時開賽）

柏雷素爾季初要兼顧亞冠盃搞到拖垮聯賽成績，現時落後榜首球隊大宮松鼠15分，話就話仲有大把時間追，但要後來居上奪冠嘅難度都幾高。既然聯賽冇運行，咁咪主攻盃賽囉，柏雷素爾喺亞冠盃成功殺入八強，對手係沙特阿拉伯球隊艾沙比，唔算易踢，而且呢場波有排都未打，依家都係專心爭住聯賽盃先，大軍進攻重心李安度杜明基斯雖然有傷在身上陣成疑，但仲有個當打射手工藤壯人孭飛。
三箭主場冇優勢

廣島三箭首席門將西川周作跟隨日本國家隊踢緊洲際國家盃，冇咗呢個猛將把關，防守力點都要打折扣。三箭作客演出明顯勝主場，佢哋今季主場贏過三場，不過對手只係大分三神、甲府風林及鳥棲砂岩等次級球隊，而且佢哋近六次主場對柏雷素爾只係贏過一場，毫無優勢，讓波梗係信唔過啦！