鬥牛兵報仇 撞瓜超霸鷹

猪拉多纳

射手個個弗 態度Very Good

洲際盃分組賽嚟到尾聲，今晚大戰有尼日利亞同西班牙喺B組交鋒。球迷有印象嘅話，應該記得「超霸鷹」喺98世盃分組賽憑奧利殊入波反勝西班牙，跟手再喺最後一輪分組賽輸畀巴拉圭，間接令「狂牛兵團」出局，諗番起都覺得經典。不過今時唔同往日，家陣一隊變咗褪色非洲雄獅，一隊係世盃No.1，今晚一於撐1.77倍「讓客」，見證西班牙報番15年前出局之仇！（無綫翡翠台、高清翡翠台及中央5台周一凌晨3:00直播）

尼日利亞上仗以1:2輸畀烏拉圭，目前雙方喺B組同樣揸住3分，但烏拉圭最後一仗對手只係「快樂足球」大溪地，「超霸鷹」想出線嘅話點都要砌低西班牙，難度梗係唔細啦！
尼日利亞攻守皆弱

「張峰」認為尼日利亞球員係就係夠晒活力，弊在攻守兩瓣都麻麻，就講首場分組賽對大溪地場波，冇錯，「超霸鷹」係大勝6:1，但一班鋒將糟蹋咗3、4次單刀機會，對住大溪地就話大把「餐士」畀你嘥都冇所謂啫，但對住西班牙邊有咁多機會畀你攻吖？

西班牙現時有6分喺手，出線基本上冇問題，擔心班國腳會Hea踢揸流攤？「張峰」又覺得唔會喎！佢哋上場對住大溪地係就係半力出擊，但班副選落到場好似搶錢咁款，最尾照樣屠殺對手數夠10粒，比賽態度Very Good！

最重要係費蘭度托利斯喺呢場波獨取4粒，韋拿又大演帽子戲法，加上另一鋒將蘇爾達度喺首仗亦有士哥，家吓件件「鬥牛」射手都開晒齋，腳風、信心同狀態都一樣咁好，要數鑊「超霸鷹」勁嘅有幾難先！
洲際盃賽制

現為分組賽階段，8隊分2組，每組4隊進行單循環比賽，每組首、次名將進身4強。
鬥牛兵就住踢博「半細」

西班牙已經連續6場半場冇失波，今次尼日利亞唔齊腳，火力有限唔似射得爆對方大門，要喺上半場入波更加係難上加難。另一方面，由於西班牙和波都可以首名出線，未必一開波就同尼日利亞鬥搶，既然係咁，1.52倍半場入球細的確可以考慮。
西班牙24戰不敗

兩隊唯一交手係98年世盃尼日利亞贏3:2。

尼日利亞連續2場分組賽開入球大，入7球、失3球。

西班牙連續6場半場不失。

西班牙連續24場不敗。